Ezkerrenea

Aginagako Goialdeko baserria, Iarbebekoa eta Etzabal baserrien artean dago.

Ezkerrenea seguru asko XIX. mendean egindako etxea da baina garai hartako izen zerrendan ez da izen horrekin agertzen.

Urdairaaundiko maizterrena zen, Joxe Manuel Balerdirena. Urdairan maizter, eta Ezkerrenean nagusi zen. Familia Urdairaaundin bizi zen, Ezkerrenea hutsik mantentzen zuten bitartean. Ondoren, maizter bizitu zen 11 senide zituen Ugarte familia. Igeldoko Asurrikitik etorri ziren, eta Ezkerrenean sei bat urte pasa eta gero, Santsonenera pasa ziren. Ondoren, 1930 inguruan, denboraldi batez Joxe Mari Eskudero egon zen maizter, Nieves Segurola bere emaztearekin (Patxi Segurolaren -Patxi Anikateren- alaba). Urte batzuk egin zituzten bertan, eta Aginagako Mitxelkonera joan ziren. Nikolas Balerdi, Joxe Manuel Balerdi jabearen semea ere bizitu zen, eta hau joan zenean, etxea saldu egin zuten. Gaur Urizar Aizpitarte familiarena da, eta bertan bizi dira. Ez dauka baserri jarduerarik.

Baserriaren lotutako argazkiak:

• Ezkerrenea.
• Eskudero Perurena sendia: 1930 urtean Aranoko Liztorregitik etorri ziren (Egioletatxikira). Ezkerretik eskubira eta goitik behera: Ines, Eusebio, Martin, Dolores, Joxe, Bibiana, Joxe Mari (Egioletatxikin jaio zen), Joxepa Iñaxi Perurena (Aranoko Goroskeneako alaba), Miren (Egioletatxikin jaio zen), Gregorio Eskudero (Aranoko Liztorregiko semea).
• 1920 Igeldoko Baldazarreko Zinkunegi Arruti familia 1-. Maria (Igeldoko Iturrietara ezkondu zen). 2-. Joxe Domingo (Urtetara ezkondu zen). 3-. Joxe Kruz (Baldazarren geratu zen, Benito Zinkunegiren aita). 4-. Joxe Ramon (Antiguara ezkondu zen). 5-. Manuel. 6-.Kontxi (Igeldoko Asurrikira ezkondu zen). 7-. ? 8-. Sebastiana (Aginagako Ezkerrenera ezkondu zen, Axurriko Joxe Joakin Ugarte Esnalekin). 1930 urtean Santsonenera pasa ziren.
• 1950. Joxe Joakin Ugarte Esnal.
• 1950. Sebastiana Zinkunegi Arruti.